సీమంతం, యూనిఫామ్ పంపిణీ: సర్పంచ్ కోర్సా ఆదిలక్ష్మి

ములకలపల్లి: మూకమామిడి గ్రామపంచాయతీలోని సాయిరాంపురం అంగన్వాడీ కేంద్రంలో గురువారం సర్పంచ్ కోర్సా ఆదిలక్ష్మి ఆధ్వర్యంలో గర్భిణీ స్త్రీకి సీమంతం నిర్వహించారు. అనంతరం, అంగన్వాడీ పిల్లలకు ప్రభుత్వం ఉచితంగా అందించిన యూనిఫామ్ దుస్తులను పంపిణీ చేశారు.

మూకమామిడి గ్రామపంచాయతీ పరిధిలోని సాయిరాంపురం అంగన్వాడీ కేంద్రంలో గురువారం రెండు కార్యక్రమాలు ఏకకాలంలో జరిగాయి. సర్పంచ్ కోర్సా ఆదిలక్ష్మి ఆధ్వర్యంలో గర్భిణీ స్త్రీకి సీమంతం నిర్వహించడంతో పాటు, అంగన్వాడీ పిల్లలకు ప్రభుత్వం ఉచితంగా అందించిన యూనిఫామ్ దుస్తులను పంపిణీ చేశారు.

మొదటగా, పోషణ అభియాన్ కార్యక్రమంలో భాగంగా గర్భిణీ స్త్రీకి సంప్రదాయబద్ధంగా సీమంతం జరిపించి, పసుపు కుంకుమ, పండ్లు అందించి ఆశీర్వదించారు. అనంతరం, కేంద్రంలోని చిన్నారులకు ప్రభుత్వం సరఫరా చేసిన యూనిఫామ్ దుస్తులను సర్పంచ్ స్వయంగా అందజేశారు.

ఈ సందర్భంగా సర్పంచ్ కోర్సా ఆదిలక్ష్మి మాట్లాడుతూ, మన సంప్రదాయాలలో సీమంతానికి ఎంతో ప్రాముఖ్యత ఉందని, గర్భిణీ స్త్రీకి మానసిక ధైర్యం చెప్పడం, సంతోషంగా ఉంచడం ముఖ్యమని అన్నారు. ప్రభుత్వం అంగన్వాడి కేంద్రాల ద్వారా గర్భిణీలకు, బాలింతలకు పౌష్టికాహారం, టీకాలు, ఆరోగ్య పరీక్షలు ఉచితంగా అందిస్తుందని, అందరూ వీటిని సద్వినియోగం చేసుకోవాలని సూచించారు. గర్భిణీలు, బాలింతలు పౌష్టికాహారం తీసుకోవడంతో పాటు అంగన్వాడీ సేవలను పూర్తిగా వినియోగించుకోవాలని తెలిపారు. సీమంతం అనేది తల్లికి మానసిక స్థైర్యం ఇచ్చే కార్యక్రమమని ఆమె పేర్కొన్నారు.

ప్రభుత్వం అంగన్వాడి కేంద్రాలలో చిన్నారుల కోసం ఉచితంగా యూనిఫామ్ దుస్తులను అందిస్తుందని, ప్రతి ఒక్క తల్లిదండ్రులు తమ పిల్లలను ప్రభుత్వ అంగన్వాడి కేంద్రాలలో చేర్పించాలని కోరారు. అంగన్వాడి కేంద్రాల నుండి పౌష్టికాహారం అందుతుందని, ఇక్కడ చదువుతో పాటు ఆటపాటలు, పోషకాహారం అన్నీ లభిస్తాయని సర్పంచ్ తెలిపారు.

కార్యక్రమంలో సాయిరాంపురం పాఠశాల ప్రధాన ఉపాధ్యాయురాలు అజ్మీరా లలిత, అంగన్వాడీ టీచర్ వట్టం జయ, ఆశ వర్కర్లు బచ్చల పద్మ, మహిళా సభ్యులు ఊకె సునీత, మెచ్చ సత్యవతి, కీసర వరలక్ష్మి, పద్దం రాధ, సున్నం శ్రీవల్లి, బొగ్గం వెంకటరమణ, గ్రామ మహిళలు, చిన్నారులు పాల్గొన్నారు.