ప్రగతిశీల మహిళా సంఘం (పిఓడబ్ల్యు) ఉమ్మడి తూర్పుగోదావరి జిల్లా 9వ మహాసభ రాజానగరంలో మంగళవారం జరిగింది. ఈ సందర్భంగా, హింస లేని జీవితం మహిళల హక్కు అని సంఘం ప్రతినిధులు నొక్కి చెప్పారు. మహిళల భద్రత, చట్టాల అమలుపై చర్చించారు.
పిఓడబ్ల్యు జెండా ఆవిష్కరణతో ప్రారంభమైన ఈ మహాసభలో, రాష్ట్ర అధ్యక్షురాలు ఎం. లక్ష్మి మహిళలపై జరుగుతున్న హింస, అణచివేతపై తీవ్ర ఆందోళన వ్యక్తం చేశారు. మహిళలకు చట్టాలు, హక్కులు ఉన్నప్పటికీ, ఆచరణలో అవి అమలు కావడం లేదని ఆమె అన్నారు. కార్పొరేట్ దోపిడీ మహిళలను మరింత పరాధీనతకు గురి చేస్తుందని, దీనికి వ్యతిరేకంగా పోరాడాలని పిలుపునిచ్చారు.
మరో వక్త, రాష్ట్ర కమిటీ సభ్యురాలు ఇ. మల్లిక, మహిళలకు ప్రజాస్వామిక హక్కులు చెప్పుకోవడానికి మాత్రమే పరిమితమయ్యాయని, ఆచరణలో అవి అమలు కావడం లేదని విమర్శించారు. పాలకులు పురుషాధిక్య భావజాలంతో మహిళల హక్కులను కాలరాస్తున్నారని ఆమె అన్నారు.
మహాసభలో గత ఉద్యమాలను సమీక్షించి, భవిష్యత్తు పోరాటాలకు సిద్ధం కావాలని ప్రతినిధులకు సూచించారు. అనంతరం, జె. సత్యవేణి అధ్యక్షతన నూతన కార్యవర్గాన్ని ఏకగ్రీవంగా ఎన్నుకున్నారు. ఈ ఎన్నికలో బి. శ్రీదేవి ప్రధాన కార్యదర్శిగా ఎన్నికయ్యారు.
ఈ మహాసభలో వివిధ రాజకీయ, ప్రజా సంఘాల నాయకులు పాల్గొని, మహిళల హక్కుల పరిరక్షణకు మద్దతు తెలిపారు. సిపిఐ (ఎంఎల్) న్యూడెమోక్రసీ, ఏఐకేఎంఎస్, ఐఎఫ్టియు నాయకులు సందేశాలు ఇచ్చారు.
