డాక్టర్ బి.ఆర్. అంబేద్కర్ కోనసీమ జిల్లాలోని అల్లవరం మండలం గోడిలో ఉన్న గురుకుల హాస్టళ్లలో విద్యార్థులు కనీస సౌకర్యాలు లేక తీవ్ర ఇబ్బందులు పడుతున్నారని భారత విద్యార్థి ఫెడరేషన్ (SFI) జిల్లా కన్వీనర్ కె. శంకర్, వ్యవసాయ కార్మిక సంఘం జిల్లా నాయకులు పశ్చిమల శివ ఆరోపించారు. మంగళవారం నాడు వారు ఈ హాస్టళ్లను సందర్శించి, విద్యార్థుల సమస్యలను అడిగి తెలుసుకున్నారు.
గోడి గర్ల్స్ గురుకుల హాస్టల్లో తాగునీటి సమస్య తీవ్రంగా ఉందని, వాటర్ ప్లాంట్లు పనిచేయకపోవడంతో విద్యార్థినులు మంచినీటి కోసం అల్లాడిపోతున్నారని నివేదికలో పేర్కొన్నారు. వాటర్ ట్యాంకులను శుభ్రం చేయకపోవడం వల్ల కలుషిత నీటితో అనారోగ్యాల బారిన పడే ప్రమాదం ఉందని తెలిపారు. హాస్టల్ ఆవరణ అంతా పిచ్చి మొక్కలు పెరిగి దట్టమైన పొదల్లా మారాయని, దీనివల్ల విషకీటకాలు ప్రవేశించే అవకాశం ఉందని విద్యార్థినులు భయాందోళన చెందుతున్నారని వారు వివరించారు.
బాయ్స్ గురుకుల హాస్టల్లో విద్యుత్ సరఫరా సక్రమంగా లేదని, నిరంతర కరెంట్ కోతలతో విద్యార్థులు ఉక్కపోతతో, చీకటిలో చదువుకోవడానికి ఇబ్బంది పడుతున్నారని తెలిపారు. ఇక్కడ కూడా వాటర్ ప్లాంట్లు రిపేరుకు రావడంతో తాగునీటి సమస్య నెలకొందని పేర్కొన్నారు. హాస్టల్లో సరైన సెక్యూరిటీ, వాచ్మెన్ లేకపోవడం వల్ల విద్యార్థుల భద్రత ప్రశ్నార్థకంగా మారిందని ఆవేదన వ్యక్తం చేశారు.
ఈ సందర్భంగా కె. శంకర్, పశ్చిమల శివ మాట్లాడుతూ, ప్రభుత్వం విద్యను కార్పొరేట్ స్థాయి అందిస్తున్నామని చెప్పుకోవడం మానేసి, సంక్షేమ హాస్టళ్లలో కనీస మౌలిక వసతులు కల్పించాలని డిమాండ్ చేశారు. గోడి గర్ల్స్ హాస్టల్లో వాటర్ ప్లాంట్లను వెంటనే బాగుచేయాలని, ఆవరణలోని పిచ్చి మొక్కలను తొలగించాలని కోరారు. బాయ్స్ హాస్టల్కు నిరంతర విద్యుత్ సరఫరా పునరుద్ధరించి, వాచ్మెన్ను నియమించాలని వారు ప్రభుత్వాన్ని హెచ్చరించారు.
ఈ డిమాండ్లు నెరవేర్చని పక్షంలో, విద్యార్థులు, తల్లిదండ్రులను సమీకరించి SFI ఆధ్వర్యంలో పెద్ద ఎత్తున ఆందోళనలు చేపడతామని వారు తెలిపారు. ప్రభుత్వ నిర్లక్ష్యం విద్యార్థుల భవిష్యత్తుపై ప్రభావం చూపుతోందని వారు ఆందోళన వ్యక్తం చేశారు.
