రైతు భరోసా వెంటనే విడుదల చేయాలని బీఆర్ఎస్ నాయకుల డిమాండ్

వర్షాకాలం ప్రారంభమై, రైతులు వ్యవసాయ పనులు మొదలుపెట్టినప్పటికీ, రైతు భరోసా నిధులు ఇంకా విడుదల కాలేదని బీఆర్ఎస్ పార్టీ కన్వీనర్ దొడ్డి తాతారావు అన్నారు. డిసెంబర్‌లో విడుదల చేయాల్సిన నిధులను మార్చిలో ఎకరాకు మాత్రమే విడుదల చేసి, మిగిలిన వాటికి నిలిపివేయడం పట్ల ఆయన ఆవేదన వ్యక్తం చేశారు.

ప్రభుత్వం రైతులకు ఇచ్చిన హామీలను విస్మరిస్తోందని తాతారావు ఆరోపించారు. రైతును రాజును చేస్తామని, ఎకరానికి రూ. 15 వేలు రైతు భరోసా, కౌలు రైతులకు సంవత్సరానికి రూ. 10 వేలు, పండిన ప్రతీ గింజ కొంటామని, రైతులందరికీ రుణమాఫీ చేస్తామని ఎన్నికల్లో వాగ్దానాలు చేసి, అధికారంలోకి వచ్చిన తర్వాత వాటిని గాలికి వదిలేసిందని ఆయన విమర్శించారు.

కాంగ్రెస్ ప్రభుత్వం రైతులను మోసం చేస్తోందని, ఇచ్చిన హామీలను తుంగలో తొక్కి బాధపెడుతోందని తాతారావు పేర్కొన్నారు. అధికారంలోకి వచ్చిన ఈ మూడేళ్లలో రైతు భరోసాను కేవలం మూడుసార్లు మాత్రమే విడుదల చేసిందని, అందులోనూ మొదటిసారి మూడు ఎకరాలకు, ఆ తర్వాత రెండుసార్లు ఒక ఎకరానికి మాత్రమే విడుదల చేసి చేతులు దులుపుకుందని ఆయన తెలిపారు.

గతంలో కేసీఆర్ పాలనలో వ్యవసాయ పనులు ప్రారంభం కాకముందే రైతుల ఖాతాల్లో డబ్బులు జమ అయ్యేవని, కానీ ఈ ప్రభుత్వంలో ఆరుసార్లు విడుదల చేయాల్సిన రైతుబంధు కేవలం మూడుసార్లు మాత్రమే, అదీ ఒకటి రెండు ఎకరాలకు మాత్రమే జమ చేశారని ఆయన అన్నారు. 2018 నుండి 2023 వరకు కేసీఆర్ పాలనలో 11 సార్లు రైతుబంధు వేశారని, ప్రతి సంవత్సరం మే, డిసెంబర్ నెలల్లో రైతుల ఖాతాల్లో డబ్బులు జమ అయ్యేవని ఆయన గుర్తు చేశారు. కేసీఆర్ పాలనలో రైతులు రాజుల్లా ఉండేవారని, వారి కుటుంబాలు ఆనందంగా జీవించేవారని తాతారావు అన్నారు. రాష్ట్రంలో 66 లక్షల రైతులకు రూ. 70 వేల కోట్ల సహాయం చేసిన ఏకైక ముఖ్యమంత్రి కేసీఆర్ అని ఆయన కొనియాడారు. అలాగే, 4.5 లక్షల ఎకరాల పోడు భూములకు లక్ష 50 వేల మంది గిరిజనులకు పట్టాలు ఇచ్చి వారి జీవితాల్లో ఆనందం నింపారని, పోడు భూములకు రైతుబంధు వేసి గిరిజనులను రారాజును చేశారని ఆయన తెలిపారు. ప్రస్తుతం రైతులు వర్షాల కోసం ఎదురుచూస్తున్నట్లుగానే రైతుబంధు కోసం ఎదురుచూస్తున్నారని, ఈ మూడు సంవత్సరాలలో కాంగ్రెస్ ప్రభుత్వం రైతులను అప్పుల్లోకి నెట్టివేసిందని, తక్షణం రైతు శ్రేయస్సును దృష్టిలో ఉంచుకొని అందరికీ రైతుబంధు విడుదల చేసి ఆదుకోవాలని ఆయన కోరారు.